Jisòs ɨ yɨ gò’sɨ̀ ŋêyn njùmtɨ̀sɨ ibam nɨ̀ ŋweyn

Ŋwà’lɨ̀ Matìyò 26

Jisòs ɨ yɨ gò’sɨ̀ ŋêyn njùmtɨ̀sɨ ibam nɨ̀ ŋweyn

26 Àŋena ni se sɨ yɨ, Jisòs ɨ lì àbayn ɨ fu àyòŋnɨ̀ sɨ̂ Fɨ̀yìnì fɨ̀ ɨ be’lɨ ɨ fu sɨ̂ njùmtɨ̀sɨ ibam nɨ̀ ŋweynsɨ ɨ bè na, <<Yì ku ɨ̀ yɨ. Ɨwêyn nɨn ghɨ ɨ̀wûyn wom.>>

27 Wu fi lì bôm mɨ̀lù’ ɨ fu àyòŋnɨ̀ sɨ̂ Fɨ̀yìnì fɨ̀ ɨ fu sɨ̂ àŋena, ɨ bè na, <<Yì nyvɨ nô zɨ ghɨ̀ jɨ̀m.

28 À n-ghɨ mɨ̀lûŋ mêm mzɨ̀ a mà sfɨ̀s sɨ̂ ndvɨ̀ sɨ chɨl mɨkâyn mɨ̀ Fɨ̀yìnì ta ka fɨ lesɨ ɨ̀ fu mbɨsɨ àŋena.

29 Mɨ n-bê sɨ̂ zɨ̀ na mà læ̀ bu fì nyvɨ wi mɨlû’ nâ mèyn sɨ chem achi ghè a ka mà kasî nyvɨ̀ sɨ a nfɨ ghesɨ̀nà alè’ ɨfòyn nɨ̀ Bò wom.>>

30 Àŋena yɨ mèsì ɨ yem njàŋ sɨ koʼsɨ Fɨyini ɨ fvɨ ko’ atû kfɨ̂yn Olìfsɨ̀.

Jisòs ɨ fè’tɨ̀ na Bità ɨ nì mo zɨ̀

31 Jisòs ɨ kæ bè na, <<A nì nà ghɨ nɨ̀ntu’ kɨ̀ nô layn, a nô zɨ ghɨ̀ jɨ̀m le’ vìsi mà, kɨ̀ ighel ta ghɨ sɨ ghɨ ma ghɨ nya’ meyn a Ŋwà’lɨ̀ Fɨ̀yìnì na, <Mɨ nì zue nchì bzɨsɨ, a sɨ gwosɨ.>

32 Mɨtì, a à na ghɨ ta ghɨ làysɨ ma sɨ ikfɨ, a mà ndu a Galìlî sɨ a yi asɨ.>>

33 Bità ɨ bè na, <<Ghɨ n-ghɨ sɨ le’ sɨ visi mɨ và ghɨ̀ jɨ̀m, ma bû læ̀ mòm sɨ ateyn.>>

34 Jisòs ɨ bè sɨ̂ ŋweyn na, <<Mɨ n-bê sɨ̂ và samo’ na lûm ngvɨ nɨn nì se sɨ toŋ nɨ̀ntu’ layn ma wà mo meyn mà ìngal ì tal.>>

35 Bità ɨ fi bè na, <<Mɨ n-ghɨ mɨ sɨ kfɨ kfɨ ghesɨ̀và, ma bu læ̀ mò vâ.>>

Njùmtɨ̀sɨ ibam nɨ̀ ŋweynsɨ ɨ boŋ be ndu kɨ tî sɨ̀ jɨ̀m.

Jisòs ɨ jèm a gvêyn Gètsemanì

36 Jisòs ɨ lù ŋêyn njùmtɨ̀sɨ ibam nɨ̀ ŋweynsɨ ɨ ndù alè’, ghɨ toŋtɨ̂ na Gètsemanì, ɨ bè sɨ̂ àŋena na, <<Yì du’i afêyn, mà ndu afi ɨ̀ jèm.>>

37 Wu bè tì, ɨ lì Bità ŋêyn woyn Zebedì ghì ghɨ̀ bò, ɨ se sɨ ndu-à; awo a zɨ̀tɨ̀ sɨ nà fu nge’ a ŋweyn ikfà’tɨ̀ nô sɨ a ŋaŋ.

38 Wu kæ be sɨ̂ àŋena na, <<Awo a li-a nɨn fu nge’ a ma ikfà’tɨ̀ nô sɨ a ŋaŋ, ma kɨ kà’ a kɨ zue ma. Yì du’i kɨ̀ afêyn, nà boŋ gvɨ̂tɨ̀-à, mà gvi.>>

39 Wu bè tì ɨ fi kɨŋtɨ ɨ ndù asɨ sɨ ilæ tèyn ɨ nyɨ̀ŋi ndù àkfɨ̀-akfɨ ɨ nà sɨ jemà, bê na, <<Bò wom, yi na boynɨ-à wa fsɨ bôm nge’ yèyn sɨ a ma awu. Nô mɨ tì, ni kɨ iwo zɨ̀ a yi n-kfeynɨ sɨ̂ và, ka wa n-nì iyemi.>>

40 Wu jèm ɨ mèsì ɨ se sɨ ndù ma njùmtɨ̀sɨ ibam nɨ̀ ŋweyn sìsɨ̀ sɨ̀ tal sɨ buni-à. Wu bɨf sɨ̂ Bità na, <<Ba yi ti n-ghɨ na yi nà n-kâ’ yi bû boŋ dù’ì iyvɨ ghesɨ̀nà ɨ̀ nà gvɨ̂tɨ̀ kɨ sɨ a fɨ̂lè’nɨ̀ tèyn ma?

41 Yì na gvɨ̂tɨ̀-à, jemà ka imôm ì gvi sɨ̂ zɨ̀. Mɨ n-kya na à n-ghɨ a yi ikfà’tɨ̀, yi kôŋ sɨ ni ta mà bè, mɨtì a bu àdya’ a yi ɨwùyn.>>

42 Wu fi kasi lù ɨ ndù ɨ nà sɨ jemà bê na, <<Bò wom, wà na ghɨ wi sɨ fsɨ bôm nge’ yèyn sɨ̂ mà, ma wà ti n-bê na, mɨ n-kelɨ kɨ sɨ nyvɨ, wa nì, yi kfeyn kɨ̀ ta wà n-kɨŋ.>>

43 Wu jèm tì, ɨ se sɨ kasi sɨ gvì ɨ fi yeyn àŋena, ghɨ bunî kɨ buni bòm ta mbunisɨ nà n-sû ghɨ kɨ nô ghɨ a àŋena asɨ.

44 Wu fi kasi ɨ lu kɨ lu ɨ ndu ɨ nà sɨ fì jemà, na à na sɨ ghɨ ìngal ì tal, bê kɨ ìwo zɨ̀ a wù nì be sɨ asɨ.

45 Wu n-jem meyn mèsì ɨ kasi ndù ɨ bɨf sɨ̂ àŋena na, <<Ba yi ti n-ghɨ na yi bu tô’ bunî kɨ buni, yvɨ̂tɨ̀-à? Yì na kya na ɨlvɨ kfeyn meyn. Ghɨ sɨ kɨŋ sɨ fu Wâyn Wùl sɨ̂ ghelɨ awo a bɨ-a.

46 Yì lali ghɨ lu. Yì yeyna. Ɨwêyn nɨ̀n gvî wul vzɨ̀ a wù n-bey’lɨ ma.>>